07-22-2022
Ինչ է երիկամի բիոպսիան ?
Երիկամի բիոպսիան միջամտություն է, որի ժամանակ երիկամից վերցվում է մեկ կամ մի քանի նմուշ և ուղարկվում է հյուսվածքաբանական հետազոտության երիկամի հիվանդության ճշգրիտ ախտորոշման նպատակով:
Որ դեպքերում է հնարավոր երիկամի բիոպսիա կատարման անհրաժեշտություն ?
- Շարունակական արյունամիզություն:
- Մեզի մեջ մեծ քանակությամբ սպիտակուցների առկայություն (պրոտեինուրիա):
- Երիկամների հիվանդություններ, որոնց ժամանակ արյան մեջ բարձրանում է նյութափոխանակության արգասիքների մակարդակը (Օր. կրեատինին):
- Երիկամի գոյացության ժամանակ՝ բնույթը որոշելու նպատակով:
Որն է երիկամի բիոպսիայի կատարման նպատակը ?
- Ախտորոշել երիկամի հիվանդությունը, որը այլ մեթոդներով հնարավոր չի լինում ախտորոշել:
- Երիկամի բիոպսիան օգնում է կազմել բուժման պլանը:
- Որոշել թե ինչքան արագ է զարգանում երիկամի հիվանդությունը:
- Օգնում է գնահատել երիկամի բուժման արդյունավետությունը:
- Օգնում է հսկել փոխպատվաստված երիկամի աշխատանքը, կամ գտնել երիկամի շգործելու պատճառը:
Ինչ է կատարվում նախավիրահատական շրջանում ?
Հիվանդը մանրամասն բժշկին պետք է ներկայացնի իր հիվանդության պատմությունը, նախկինում կրած կամ զուգահեռ ընթացող բոլոր հիվանդությունների կամ տարած վիրահատությունների մասին: Եթե հիվանդի մոտ առկա է զարկերակային գերճնշում (զարկերակային ճնշման բարձրացում) կամ հիվանդը ընդունում է հակամակարդիչ դեղորայք, ապա վերոնշյալ գործոնները կարող են նպաստել հետվիրահատական շրջանում արյունային բարդությունների առաջացմանը: Հետևաբար հիվանդին կարիք է լինում նախապատրաստել. Նշանակվում է զարկերակային ճնշումը կարգավորող դեղորայք, ժամանակավորապես հանվում են կամ փոխարինվում են հակամակարդիչ պրեպարատները: Հանվում են ոչ ստերոիդ հակաբորբոքիչ պրեպարատները:
Երիկամի բիոպսիայի ընթացքը
Երիկամի բիոպսիան կատարվում է սեդատիվ կամ ընդհանուր անզգայացման ներքո:
Ուլտրաձայնային սարքի հսկողության ներքո դեպի երիկամ է անց կացվում ասեղ – ատրճանակը, որի օգնությամբ երիկամից վերցվում են կտորներ:
Միջամտությունը տևում է մոտ 15 րոպե, որից հետո հիվանդը մի քանի ժամ մնում է կլինիկայում բժշկի հսկողության տակ:
Հաջորդող երկու շաբաթների ընթացքում արգելվում է ֆիզիկական ծանրաբեռնվածություն:
Ինչ կողմնակի երևույթներ կարող են դիտվել երիկամի բիոպսիայի հաջորդող օրերին ?
- Արյունային արտադրություն ծակված հատվածից, որը լինում է աննշան:
- Ցավոտություն, որը անցնում է հաջորդող օրերի ընթացքում:
- Ինֆեկցիոն բարդություններ, որոնք դիտվում են շատ հազվադեպ:
Այսպիսով երիկամի բիոպսիան համեմատաբար անվնաս միջամտություն է, որի միջոցով կարելի է ստանալ երիկամի վերաբերյալ այնպիսի տեղեկատվություն, որը ուրիշ ոչ մի հետազոտությամբ հնարավոր չէ ստանալ:
